የኢትዮጵያ ታሪክ እና ባህል በዓለም ካሉት ታላላቅ ከሚባሉት ታሪክ እና ቅርፅ ካላቸው ሀገራት ውስጥ ይመደባል። በአርኪኦሎጂ ምርመራ የተገኙ ማስረጃዎች መሠረት ወደ ሦስት ሺህ ዓመት ለሚጠጋ ጊዜ በታላላቅ ከተሞች እና መንደሮች መደራጀቷ ተረጋግጧል። ኢትዮጵያ ከግብፅ እና ኑቢያ ጋር በአፍሪካ ውስጥ ካሉት ጥንታዊ ታሪካቸውን በጽሑፍ ካስቀመጡ ጥቂት አገሮች አንዷ ናት።   ጥንታዊ መንግሥቷን በሰሜን ግዛት አክሱም ላይ መሥርታ በአካባቢው ከነበሩት ታላቅ መንግሥት ሆና ከጥንታዊ የሮማዊያን እና የደቡብ እስያ (ህንድ) ኃያላን መንግሥታት ጋር በንግድ እየተገናኘች ወታደራዊ ኃይሏን እና ግዛቷን በማንሰራፋት አሁን ሱዳንና የመን የሚባሉትን ታስተዳድራቸው ነበር።  የአክሱም ሐውልቶች ከአፍሪካ ታላላቅ ጥንታዊ ቅርጾች መካክል ይመደባሉ።

ምዕራባዊያን የ”ሚዲቫል” ዘመን ወይም የጨለማው ዘመን ብለው በሚጠሩት ወቅት ኢትዮጵያ የሚያኮራ ታላቅ የስነጽሑፍ እና ስነስዕል ጥበብ እያዳበረች ነበር።  ለዚህም ትልቅ አስተዋጾ ያበረከተችው የኢትዮጵያ ኦርቶዶክስ ተዋሕዶ ቤተ ክርስቲያን ናት።በታላቁ ክብረ ነገሥት የንጉሥ ሰሎሞን እና የንግሥተ ሳባን ታሪክ ተጽፎ እናገኘዋለን።  በተጨማሪም ልጃቸው ቀዳማዊ ዓፄ ሚኒልክ ታቦተ ጽዮንን ወደ ኢትዮጵያ እንዴት አድርጎ እንዳመጣና የኢትዮጵያ የመጀመርያው ሰሎሞናዊ ንጉሠ ነገሥት ሆኖ እንደነገሠም ይነግረናል።

ዛሬ ኢትዮጵያ የነጻነት እና የፀረ ቅኝ ግዛት ተምሳሌት ናት። መላው የአፍሪካ አህጎር በቀኝ ገዢዎች ቀንብር ስር ሲወድቅ በዳግማዊ ዓፄ ምኒልክ ዘመነ መንግሥት በየካቲት ፳፫ ቀን ፲፰፻፹፰ ዓ.ም. ኢትዮጵያ የጣልያን ወረራን አሸንፋ ነፃነቷን አስከብራለች። በድጋሚ ከአርባ ዓመት በሗላ በሙሶሊኒ መሪነት ፋሽስት ጣልያን አገራችንን ሲወር ግርማዊ ንጉሠ ነገሥት ቀዳማዊ ዓፄ ኃይለ ሥላሴ በጦር ሜዳም በዲፕሎማሲም ታላቅ ተጋድሎ አድርገዋል። ከሁለተኛው የዓለም ጦርነት በኋላ ንጉሠ ነገሥቱ አፍሪካን ከቅኝ ግዛት ነፃ ለማውጣት በሚደረገው ትግል ዓለም አቀፍ ድምጽ ሆነዋል።